اوقات الدوام بالدوائر الحكومية

طبعاً الافكار الغير مدعومة بأمثلة تطبيق في الدول الأوربية تعتبر افكار ليست ذات معنى في هالبلد لأننا تعودنا وتربينا على ان عقولنا لا تتعدى افكار ونظريات الغير .. تربينا في مدارسنا وبيوتنا على تهميش عقولنا وقدراتها واحباطها .. فأصبحت عقول الاغلبية مليئة بكثير من الاعتقادات السلبية بأن عقول الاوربيين افضل مننا وانه مايغيب عليهم شي وطالما انهم ما طبقوا فكرة ما هذا يعني ان الفكرة حتما فاشلة ..
واتمنى اني اعيش يوم اسمع فيه في احد الدول انهم يشيدون باحد قوانيننا وانضمتنا بالبنان وتطالب شعوبهم بتطبيق ما اعجبهم عندنا ..

أما بعد ..

من خلال مراجعاتي للدوائر الحكومية المزدحمة بالمراجعين لاحضت ان اغلب اللي اوراقهم ناقصة يترجون الموضف ويقولون له اننا طالعين من الدوام بس عشان نخلص هالموضوع .. وتساءلت .. من الشخص اللي حدد مواعيد الدوائر الحكومية وعلى اي اساس ؟؟
ابي افهم وش الفائدة المرجوة من توحيد مواعيد دوام الدوائر الحكومية ؟؟
مادري على بالهم ان الشعب عاطل ؟ ولا وش الموضوع ؟ صحيح انه نسبة العطالة قوية بس ماتوصل لـ 100 % فيه ناس تداوم باقي .. ليه مايصير دوام الدوائر الحكومية مثل البنوك يقدر الانسان يخرج من دوامه ويروح لهم ..
خصوصا ان دوائرنا تحتاج لسنين طويلة للتطوير والواحد في اغلب الاحيان يحتاج انه يروح كل يوم لعدة ايام عساس يخلص امورة .. مو معقول ان كل شخص يستأذن يوميا للخروج ؟!

ومن الناحية المرورية .. ابي افهم ليه نخلي كل العالم يصحون في نفس الوقت ويداومون في نفس الوقت ويطلعون في نفس الوقت وانواع الازمات المرورية تصير في هالاوقات .. والاحصائيات تؤكد ان عدد السيارات في ازدياد مستمر ..
من زين شوارعنا يعني اللي صارت الحفريات وتقفيل الشوارع والمطبات فيها اثبات لتواجدنا في هالبلد ..

مادري اذا كان فيه دولة من الدول اللي عندهم عقول طبقوا هالشي عشان نقنع ربعنا فيه ولا لا .. بس اتمنى من الانسان اللي بامكانه تغيير هالموضوع انه يعيد النضر فيه ..