كيف نكتشف اخطاءنا

قال لي واحد من الاخصائين النفسيين اللي رحت له من منطلق اني ابي ازيد انضباطي في الحياة والتزامي وتنفيذي للأمور اللي ودي انفذها .. اني بحاجة ضرورية لأن أقوم بأمر ما ساتطرق اليه بعد قليل .. وكنت ارفض اني اقوم بهالشي بحجة انه امر غير عملي ولا له اي فائدة ومن الامور المثالية اللي ماحب اني اتبعها .. ولاكنت فاهم بالظبط ليه يبيه .. رحت له اكثر من مرة وطلب مني هالموضوع وانا اتهرب منه احاول ابحث عن حل بديل بدون الالتزام بالموضوع اللي طلبه مني ..

الشي اللي كان يطلبه مني اني اول ماصحى من النوم اكتب قائمة بالامور اللي ابي اسويها اليوم واحدد لها وقت .. وفي نهاية اليوم اكتب قدام كل قائمة هل نفذتها ولا لا .. واذا كان لا اكتب السبب .. وانفذ هالموضوع لعدة ايام واجيب له الاوراق .. ماكنت فاهم ليه يبي يسوي كذا ولا كنت مقتنع ..

وبعد فترة لقيت في احد مواد تخصصي اننا بحاجة لتدوين بعض الامور المشابهه لهذه الفكرة حتى نكتشف الاخطاء .. وتساءلت وش ضرورة هالتدوين .. ليه مثلا ما امشي في الشركة وابحث عن المشاكل او الاخطاء واحلها وانتهينا .. وبعد البحث والتأمل في الموضوع عرفت السبب ..

السبب هو ان المخ والافكار متشعبة ومتشتته .. لما الانسان يجلس مع نفسه ويتساءل ليه انا كذا وش المشكلة ليه ماسويت هالموضوع وليه ماسويت ذاك وليه ماسويت ذاك مابيطلع بأي نتيجة لان افكاره جالسة تتشعب وتتشتت .. لكن لو حدد الامور اللي ماسواها وذكر السبب وحصر الاسباب وتأمل فيها بيكون قدر انه يوصل للمشكلة الرئيسية اللي تحتاج لحل .. والكتابة تلزم الواحد بالتفكير في هالموضوع لو جلس الواحد بدون مايكتب بيتشتت ذهنه لكن لما يمسك الورقة والقلم ويحس انه محتاج يملي الفراغ الموجود امام سبب عدم تنفيذ المهمة بيلاقي انه ملزم انه يتعمق في التفكير حتى يوصل للسبب الفعلي .. وبكذا ابتعد عن التشعب في التفكير ووجد المشكلة وايجاد المشكلة نصف الحل .. وهالشي نفسه قابل للتطبيق في تخصصي لو ماكتبت الامور اللي المفروض اني اكتبها وقلت باحل الموضوع بذهني باتشعب وفيه اشياء كثير بتروح عن بالي .. الكتابة مهمة في عملية تنظيم الافكار وتنظيم الافكار مهم في عملية التفكير.

اغلب المشاكل تكمن عدم وجود الدافع الكافي ..
كل انسان في راسه كثير من الافكار اللي وده يسويها ..
لكن مو كل الافكار اللي في راسه تتنفذ ..
الافكار اللي تتنفذ هي الافكار اللي وجدت دافع قوي لتقدم نفسها على الواقع وتسحب على باقي الافكار ..
ولما الواحد يكتشف ان مشكلته انه مثلاً يجلس على النت بينما هو وده يسوي اشياء اكثر اهمية هذا يعني انه عنده دافع داخلي للجلوس على النت اقوى من الدافع اللي يدفعه لانه يسوي الامور الثانية ..

مع انه مقتنع بان الامور هذيك اكثر اهمية ..
لكن الاعتياد على القيام بأمر ما هو من اقوى الروابط الي تحتاج لكسر .. احيان تنكسر هالرابطة بسبب الظروف واحيان يظطرون الناس لكسرها بأنفسهم للتخلص منها .. وهالشي يحتاج لوقفة صارمة وقوية مع النفس .. حتى تستبدل هذه الروابط بالروابط التي نحبذها ..